Litir

Fjórir grunn-litir eru í boði í Vegrúnu:

• Móberg
• Mosi
• Grágrýti
• Ull

Þegar skilti er skipu­lagt, og jafnvel svæði í heild, skal velja einn lit af þessu grunn­vali. Þetta er liturinn sem er notaður sem bakgrunnur skilt­isins. Hann er þá einnig notaður í skó þess og skrúfur.

Litirnir hafa verið valdir og skil­greindir með hámarks læsi­leika í huga. Andstæðir litir raðast saman í samsetn­ingum sem hafa verið mældar með nútíma­þarfir og skýr­leika að mark­miði.

Við hvetjum notendur til að nota ekki hreinan svartan eða hvítan í neinum merk­ingum, þar sem þeir eru mjög ónátt­úru­legir í merk­ingum undir beru lofti — og óþarf­lega áber­andi og nánast eins og endur­skin í sumum tilfellum.

Ekki er gert ráð fyrir að blanda grunn­litum innan skilta, að undan­skildum örygg­is­lit­unum, sem eru hugs­aðir til að skera sig úr rest­inni af skiltinu og vekja skýrari athygli á þeim hluta skilt­isins.

Valið um hvort nota skuli dökkan eða ljósan grunn byggir á því að ýmist er ætlunin að leyfa merk­ing­unum að skera sig úr umhverfinu eða falla vel að því.

Móberg
Sækir í liti hálend­isins með söndum sínum og móbergs­hnúkum. Liturinn er brún-rauð­leitur og óneit­an­lega með miklum jarðtón.

Mosi
Dökk­grænn liturinn hentar vel í skógi­vaxið umhverfi, þar sem græni liturinn býr til nota­legan ramma um upplýs­ing­arnar á skiltinu.

Grágrýti
Með sinn blá-gráa lit tónar liturinn vel við kletta­veggi stuðla­bergs og hrauns. Að sumu leyti fágað­asti liturinn í litaröð­inni. Hentar vel þar sem vilji er til að vera hlut­lausari í lita­vali.

Ull
Á móti dökkum lita­mögu­leikum er stillt upp ljósum, hlýjum lit ullar­innar. Liturinn fer vel sem mótsvar á móti öllum dökku grunn­lit­unum og er notaður sem textaletur á þeim.

Einnig má víxla skilt­unum og gera þau ullar­ljós og þá er notast við Móberg í texta og upplýs­ingar á skiltin.

Auk grunn­lit­anna eru tveir örygg­is­litir skil­greindir í kerfinu, sérstak­lega notaðir til að vekja meiri athygli áhorf­andans þar sem er þörf á að benda á örygg­is­þætti.

Brenni­steinn
Hugs­aður sem grunn-örygg­is­lit­urinn til að draga athygli gesta sérstak­lega að heilum skiltum, eða hluta þeirra. Á slíkum skiltum eru tíund­aðir örygg­is­þættir sem eru mikil­vægir á slíkum stað.

Kvika
Viðbót­ar­litur með Brenni­stein­inum, notaður til að merkja sérstak­lega boð og bönn.

Í heimi Vegrúnar rúmast nánast allir litirnir undir sólinni, nema sérstak­lega er hvatt til þess að nota ekki hreinan svartan eða hvítan — þar sem þeir skera sig óþarf­lega úr nátt­úr­unni og virka nánast eins og endur­skin í samhenginu við hana.

Aðra liti má síðan finna í t.d. kortum, einstaka þjón­ustu­mynd­merkjum (t.d. bíla­stæða­merk­ingar) og víðar. Teikn­ingar og ljós­myndir færa svo allt litrófið inn í skiltin og auka dýpt skilt­anna.

Allir litirni eru hér gefnir upp í bæði CMYK og RGB lita­út­gáfum, auk RAL gildis. Mikil­vægt er að passa að rétt lita­gildi sé notað eftir fram­leiðslu.

CMYK
Prentlitir, sem eru ávallt notaðir þegar fram­leidd eru skilti og send til fram­leiðslu (nema fram­leið­andinn óski sérstak­lega eftir skilum á aðra vegu).

RGB
Skjálitir, sem á aðeins að nota til að sýna litina rétt á skjám. Þessi gildi má t.d. nota þegar útbúin eru skilti, kort og fleira sem notast á við á vefsvæðum eða merk­ingar í upplýs­inga­skjái.

RAL
Þegar ætlunin er að sprauta eða mála hluti í réttum litum, skal notast við RAL lita­gildin. Skór og skrúfur Vegrúnar eru dæmi um einingar sem eru fram­leiddar eftir þessum lita­gildum.

Hér má sækja .cclibs skjal sem inni­heldur bæði CMYK og RGB lita­gildi Vegrúnar, til notk­unar í Adobe forrita svít­unni.

Skjalið er CC Library skjal og var búið til í útgáfu 16 af Adobe Creative Suite.