Vélanotkun
Notkun véla getur létt mikið á vinnu við göngustígagerð og oft verður hreinlega ekki hjá því komist að nota þær. Vinnuvélar geta hins vegar raskað landinu mikið og því er nauðsynlegt að vinna skipulega þegar vélar eru notaðar við stígagerð. Tryggja skal að gengið sé vandlega frá öllum ummerkjum sem vinnuvélar skilja eftir sig og allt rof sé grætt upp að verki loknu.
Vinnuvélar geta einnig nýst vel til að lagfæra landslagsskemmdir, sérstaklega á opnu landi þar sem mikið er um rof.
Notkun vinnuvéla getur flýtt mikið fyrir framkvæmdum, en nauðsynlegt er að hafa í huga að handafl þarf við lokafrágang stíga til þess að ná fram náttúrulegu yfirbragði þeirra. Við stígagerð þarf að færa mikið efni til innan verkstaðar og þá koma vélar sér vel, til dæmis við landmótun og gerð ræsisskurða. Hins vegar skal forðast að láta vélina taka yfir verkið. Huga þarf að smáatriðum í framkvæmdum sem vélar ná ekki að vinna með eins mikilli nákvæmni og þegar unnið er með höndunum.
Flutningur á efni innan verkstaðar
Við upphaf verks þarf að meta hvernig haga skal efnisflutningum innan svæðisins. Ef flytja þarf efni eins og möl, grjót, torf eða jarðveg þarf að huga að því hvernig er best að koma efninu milli staða. Meta þarf hversu auðvelt er að komast að svæðinu og hversu vel það þolir þungaflutninga. Ákveða þarf hvort hægt sé að flytja efni eftir stígnum sjálfum eða hvort það þurfi að gera bráðabirgðaslóða sem síðan er græddur upp. Ekki er gott að flytja mikið af efni langar leiðir á stígnum sjálfum þar sem það gæti haft áhrif á burð hans. Í einhverjum tilfellum getur það borgað sig að flytja efni með þyrlum á svæðum sem eru erfið yfirferðar og þar sem ekki er gott að komast að verkstað.
