Almenn skilti

Þetta skilti er án efa sú tegund innan Vegrúnar sem er hægt að setja saman á fjöbreytt­asta máta. Með fjórar mismun­andi breiddir og fjórar mismun­andi hæðir, er hægt að búa til 16 ólíkar grunn­stærðir af almenna skiltinu. Þá á eftir að telja til allt að sex mismun­andi hæðir af plötum sem er hægt að festa á þau, þannig að mögu­leikinn á samsetn­ingum verður nanast ótelj­andi.

Þess vegna er mikil­vægt að skil­greina fyrst inni­hald skilt­isins sem áætlað er að setja upp, texta­magn, fjölda mynda, korta og almennra upplýs­inga … og síðan velja út frá því hversu stórt skilti og í hvaða samsetn­ingu það er valið.

Almenna skiltið saman­stendur af tveimur stoðum í skóm, sem eru fest saman í toppin með hatt. Hatt­urinn gefur mikil­vægan styrk í skiltið og um leið stillir stoð­irnar jafn­hliða saman.

Á stoð­irnar eru svo festar plötur í þeirri samsetn­ingu sem þörf er á, en þó aldrei neðar en 64 cm frá jörðu. Festa má plötur beggja vegna skilt­isins og ekki er þörf að hafa eins samsetn­ingu að „framan og aftan“ — enda getur upplýs­inga­þörf verið misjöfn eftir því hvoru megin er komið að skiltinu.

Hér er átt við heild­ar­stærð skilt­isins, breidd og hæð.

Hæð mælist frá toppi hattsins niður að jörð. Breidd frá ytri köntum stoð­anna, sem er jöfn breidd platn­anna á skiltinu.

Plöt­urnar sem raðast á skiltið koma í fyrir­fram skil­greindum stærðum og eru festar upp með 4 cm bili á milli sín.

Plöt­urnar koma í stærðum sem passa hver við aðra. Tvær plötur í minnstu stærð með bili á milli jafn­gilda stærð á einni plötu í næstu stærð.
12 cm (plata) + 4 cm (bil) + 12 cm (plata) = 28 cm (næsta stærð af plötu).

Þetta gildir um allar stærð­irnar á plöt­unum og því passa samsetn­ing­arnar alltaf saman sem heild og allar stærðir ganga upp — svo lengi sem allt efni er uppsett eftir reglum Vegrúnar.

Til að aðstoða við skilning á mögu­leikum í fram­setn­ingu er búið að smíða svokall­aðan Skilta­smið, sem einfaldar fram­setn­inguna á valmögu­leik­unum.

Með því að velja hæð og breidd skiltis, má þaðan raða inn plötum eftir þörfum og þannig sjá hvað kemst mikið fyrir á hverju skilti.

Almennu skiltin eru byggð upp með það í huga að hugsa má „fram og aftur­hlið“ skilt­isins á mismun­andi vegu. Þannig má setja mismun­andi stærðir, fjölda og uppröðun á plötum eftir hlið skilt­isins.

Einnig má sleppa „bakhlið“ skilt­isins ef engin þörf er á því að setja upplýs­ingar þeim megin. Þó skal hafa í huga að með því að hafa ekki plötur öðru megin, getur það dregið tölu­vert úr styrk skilt­isins í vind­hviðum.